• Michèle Freiburghaus

E miude Verlouf

Protokoll vo re Covid-Erchrankig


Tag 0

Ja, es het mi verwütscht. Trotz aune Vorsichtsmassnahme, trotz Abstand, trotz Maske. Es Geburiässe ds Viert het glängt – u voilà, aui heis gha, so schnäu geits. Gwüsst hanis eigentlech scho, bevor i nach Bälp bi go dr Schnäutescht mache. Isch übrigens unfassbar guet organisiert dört – u das Umegusle ir Nase isch zwar unagnähm, aber es geit tifig. U scho e haub Stund speter hani Gwüssheit gha, e Stund speter der Aaruef vo dene nätte Mönsche vom Kantonsarzt. Di näme sech Zyt für dii u dini Frage – Chapeau – aus klappet wie am Schnüerli! So ha ni se auso aaträte, die Isolationshaft.


Tag 1-3

D Botschaft chunnt langsam bi mer aa: I ha Covid 19. Bis jtz fasch keni Symptom ussert es Fiebergfüeu ohni Fieber u chly Haus- u Buchweh. Thats it. Bi mim Auter u mim Zigikonsum hätti ja gwettet, dass es mi ganz schlimm würd preiche...


Tag 4

Gschmacksverluscht: Es cha sech niemer vorstelle wos nid erläbt het, was es heisst, öppis zue sech ds nä u nüt het e Gout. Nid der gringscht. Wie fescht Ässe u Trinke wichtig si für üsi Läbesqualität, realisiert me ersch jtz im voue Umfang. Faut ds Gniesse wäg, wird’s eifach nume no Kaloriezuefuehr – u deprimierend. Sogar Wasabi-Nüssli chutzele di höchschtens no chly ir Nase. Mit dine Coronagschpänli tuuschisch di über Konsischtänze vo Läbesmittel us. Mi Favorit bischpiuswys: Spiralnüdeli – wius wenigschtens chly spannend isch im Muu.


Tag 5-6

Panik macht sech breit. Date us China zeige, dass Erkrankti ersch circa 5 bis 9 Tag nach Symptombeginn ids Chrankehuus chöme. Hesch viu Zyt ellei deheim u luegsch haut trotz Homeoffice zwangslöifig TV. Uf aune Sänder nume eis Thema: Corona. Horrorszenarie us Intensivstatione – wo jtz übrigens o jüngeri Lüt lige, Erfahrigsbrichte vo Lüt, wos deheim 3 Wuche ids Bett gschletzt het. U settigne, wos im März hei gha u immer no a de vielfältige Langzytfolge chätsche, wo vo chronischer Atemnot u Müedigkeit bis Demänzsymtom reiche. Du, wo da hocksch u der irgendwie eifach nid chasch vorstelle, dass jtz usgrächnet du söttsch ds Glück ha, nid zu dene arme Tröpf ds ghöre.


Tag 7

D Stunde u d Tage zieh sech zäiflüssig häre wie Honig, leider nume nid so süess. Du losisch i di ine, beobachtisch di säuber mit Argusouge, deponiersch zur Sicherheit e Schlüssu im Miuchchaschte, faus di d Ambulanz doch no müesst cho hole... u wartisch. Uf em Höhepunkt vor Panik lütisch mau der Beratigshotline aa u fragsch, üb me nach 7 Tag de plötzlech doch no schwäri Symptom chönnt ha. Jaja, seit me der dört, bi dere Chrankheit sig nüt sicher, es gäbs durchus, dass sech no Atemnot u höch Fieber chönn yschteue...


Tag 8-9

Es Highlight: Bim Ässe macht sech Sauz, Süüri u ganz Süesses der Spur na bemerkbar. Aber es git keni Zwüschetön u keni Fiinheite. «Es isch wi aus würdi nur die drü Grundfarbe gseh u aues zwüschedrinne u komplexe isch grau» so drückts mini Tochter us. U langsam, langsam fah ni mi o afa entspanne, Hoffnig keimt uf, dass i wahrschiinlech tatsächlech zu dene Glückleche ghöre, wo e miude Verlouf (für mi d Corona-Wortschöpfig vom Jahr) hei.


Tag 10

Symptomfrei ussert em Gschmacksverluscht, wo ja no wuchelang cha duure. Warte uf e Aaruef vom Amt, wo di i d Freiheit entlaht. Es isch juscht der 21.12., am 1 Minute vor 12i ds Nacht geit mi Isolation ds Änd, am angere Tag faht der Lockdown aa ... Trotzdäm, i füehle es ungloublechs Glücksgfüeu u tiefi Dankbarkeit – i bi am Tüüfu no einsch vom Charre gschprunge.



Aamerkige: Ja, 80% vo de Corona-Fäu verloufe wie mine, mit milde Symptom. Aber o das schützt nid unbedingt vor Langzytfouge. U o die si hoch aasteckend. U de gits äbe die 20%, wo a dere heimtückische Chrankheit schwär ds lide hei oder sogar stärbe – wie bis jtz i der Schwiz 6300 Mönsche. U das si bi wytem nid nume auti Lüt. Ds Pflegepersonal a der Corona-Front isch komplett am Aaschlag u appeliert: Jedi u jede wo ds Infektionsrisiko reschpektive d Schutzmassnahme missachtet und/oder d Chrankheit verharmlost, macht sech unger Umständ schuldig. U jedi u jede wo wäge abstruse Gründ oder wiu är/sie nid richtig informiert isch d Impfig wird verweigere, schteut es Risiko dar, nid nume für sich, sondern o für anderi. Klarteggscht: Höret verdammt no mau uf dermit, ds Syschtem mit Fahrlässigkeit oder gar Demonschtratione zuesätzlech ds belaschte u zeiget de Lüt ir Pfleg u öine Mitmönsche gegenüber chly Reschpäkt u Wärtschetzig.




Verwandte Beiträge