• Interview Noè Jeanne Freiburghaus

«Dr Autagskampf isch outomatisch wäg, när gits nume no la tribe»


A jedem schöne Summertag sit Jahre wird di App tuusigfach konsultiert. Nid säute bestimmt si d Plän vo de nächste paar Stung u wo ‘s eim später so wird häretribe. Imne englische Blogbytrag, woni im Vorfäud vo dem Interview gläse ha, wird sie aus «the holy bible of bernese people» beschribe. D Red isch vom Aaretemperatur-App vom Aareguru. Sini auersits bekannte Sätzli hei mir ii däm Frühelig öppedie äs Lächle härezouberet u chli Hoffnig, Liechtigkeit u Vorfreud gschänkt, wenn mer schüsch aues nüm so gschmuech isch gsi.

Zum Interview chunnt dr Tätschmeister vomne vierchöpfige Team ide Flipflop z Ufer na zur Aarebar z schlarpe, wo mir när ar Sunne dä ufepilgernde Masse zueluege u chli plöiderle. «Mängisch isch scho lustig, wenni näbedranne ghöre, we öpper seit: ‹Mou chumm, mir göh. Dr Aareguru het gseit, mä chönns waage!›», verzeut er. Um sini Identität machi är kes Gheimnis, aber würklech kennä tuet mä dr Maa hingerem Guru o nid. Für meh über ne z erfahre, simer direkt id Frage abtoucht.

Noè: Was isch dini Lieblingsaareschwummroute? Aareguru: Das darfi nid säge. Di isch drum für Touris verbote u o schüsch hets dert fasch keni Lüt! Aber meistens bini am Nami mit Kollege im Lorrainebad u ner am Abe machi aus Bettmümpfeli eleini no dä top secret Homerun, bevori hei id Matte gah.

Wo schlasch du dir aube d Scheichli a? Grad bir Lorrainebrügg hets es Stägli, dert isch genau vor dran ä gigantische Chemp. Wed dert use wosch, de hets di! Wed ds nid weisch, de bechunnsch es gratis Peeling! Bir Schloufe bim Zehndi bini no gar nie gsi, aber ig ha ghört, dert schlat mä o geng gottsjämmerlich d Scheiche a.

Machsch aube o Superman u tote Maa? Ja sicher, aber no besser fingi dr Münchhausen.

Was isch dr Münchhausen? Das, wo dr Baron von Münchhausen mit dr Kanonechugele gmacht het, machsch mitem Wasserbau: Du blasisch ne nume haub uf, hocksch druf u ner lasch di so la tribe.

Lieber anetzä oder eifach inegumpe? Ab 19 sicher inegumpe, aber ig ha o scho ä Chrampf übercho…

Ab wenn gehisch de dri? Mi Rekord isch 7,8 Grad.

De isch das dis persönliche «ja eh»? Neiii!! Das isch nume Gruppedruck gsi und es het viu Meitschi derbi gha u ner bini eifach… (luegt nachdänklich id Ferni und schüttlet dr Chopf) …när bini eifach dri. Aber ig ha auso glitte. Es isch würklech überhoupt nid lustig gsi. Ig has Scheisse gfunde! Bi nid sone Winterschwümmer.

Demfau bisch ono nie mit dä «Gfrörlis» mit? Nei, obwoui scho x-Mau bi iglade worde. Ig säge mr ner immer: «Ja chumm, nächsts Jahr geisch.» Ig gah aube so ab 16 Grad regumässig. 18,7 isch optimau! Aues drüber isch scho eher chli Spaghettiwasser. Letzts Jahr bi 23,irgendöppis – das isch nüt!

Werum isch d Aare für di so öppis Bsundrigs? Das tönt chli esotherisch, aber für mi het d Aare o ä starch spirituelli Komponente: Si isch eifach offe für aui u jedä, Hinz u Kunz, wo cha schwümme... Irgendwo inegumpe u när ä Sightseeing-Tour usem Wasser use – das isch scho einmalig. In angerne Schwizer Städt isch Flussbade o ä Kultur, aber scho öppis angers und usserhaub vor Schwiz wirds de äuä schwirig. Für mi isches eifach Gedanke abefahre und dr Autagskampf isch outomatisch wäg, när gits nume no la tribe.

Bisch aber scho mau ine Strudu cho? Ja, ig ha scho paar wüeschti Sache erläbt. Aus Goof bini mau würklech fasch ersoffe. Chli ungerhaub vom Muuribad hets mi imne Widerwasser abegschrisse. Ig ha no gmööget u ha vor luter Panik padlet wi gstört – auso genau au das, was mä äbe nid sött mache – u när bini vom Druck vo zungerst wieder obeusegspöit worde. U es angers Mau bini mitem Böötli ine Brüggepfiler. Das empfili würklech o niemerem. Ig findes sowieso erstunlech, wi wenig bim Böötle passiert, für dass da fasch niemer ufe anger luegt.

Würdsch ar Aare öppis verändere, wed aues chönntsch mache mit dire Gurupower? Mit so viu Macht würdi d Gletscher, wo üsi Aare spysä, wieder la wachse. Ah u dä Schisschemp ir Lorraine chönnt o wäg! Aber schüsch nüt.

Was macht dr Aareguru schüsch so dr lieb läng Tag, wenn er sech nid grad lat la tribe? Momentan schwümmi coronabedingt grad nid so ir Arbeit und ig läbe dä Summer o chli nachem Motto: «Speter afa bügle u derfür früecher höre.» Ig nimes nachem Lockdown no witer chli locker, wiu ig ha ds eigentlich huere geil gfunde! Ig bi geng nume ir Hängematte ufem Baukon gsi.

U derfür bisch mit dr Aareguru-App jtz grad rächt im Fluss? Ja, es isch grad viu gange. Neu hani zum Bispiu näb mim eigete Plakatshop no ä Aareguru-Fanshop ateiget. Dür mini ganz liecht perfektionistischi Veralagig isch das chli usgartet. Aber mir probieres jtz mau mit dem klassische Merchandising-Finanzierigsmodell, damit mir o witerhin chöi werbefrei u unabhängig blibe.

Guru-Fänshop: Es git Gönner-Abzeicheli zum ufnäiie, Chläberli mit Guru-Wiisheite u es mit «extrem viu Aareguru-Löv» gstautets und vor Linewäberei gwobnigs Badtuech hie: Aare-Guru-shop

Was het Corona schüsch so fr Uswürkige gha uf dini Badesaison? Auso hie ischs ja fang es Glauer mit dä Reglä!

Aber es erstuunt mi, wi wenig Lüt dasses ir Badi het. Ig ha dänkt es heig de meh, we aui deheime blibe.

Für mi het di Krise ä starchi Rückbsinnig zur Foug. Du merksch plötzlich chli meh was wichtig isch: Isches würklech wichtig z flüge oder machts di im Grund gno genau glich glücklech, wede eifach id Aare gehisch ga schwümme? Das Ganze het mir d Sterchi vor Eifachheit wieder zeigt. Ig schetzä das Umfäud hie meh denn je: Imne städtische Gebiet, so viu Naturoase u ner bisch ono so näch vo de krassischte Bärge! Mir vergässe zwüschine ii was für emne Outdoor-Paradies mir läbe.

Dir heit mit «50 Persone pro Aare» ii däm Frühelig äuä dr zwöit-kultigst Aarespruch usegla. Wi füut sech das a, so viral z gah? Mir hei ne säuber aui huere gfiiret. Mir hei jtz paar so Sprüch gha, wo mega passt hei u die si meistens eifach us dr Hüft gschosse gsi. Das fägt natürlech! Dä Spruch im Spezielle het o so chli d Spannig use gno, wiu viu Lüt sehr unger Stress si gsi u da isch Humor natürlech es guets Mittu. Grad aus spirituelle Füherer isches haut o ä grossi Verantwortig, dass au di tribende Schäfli wieder zrüg ids Trochene finde.

Hüt stehit dini Bedütig für d Bärner*inne usser Frag. Wi het das ganze Projektli agfange? Für mini Bachelorarbeit, wos um z Aareschwümme u Usability gange isch, hani d Urversion aareschwumm.ch gstautet. Di Site isch so chli vor sich häre dümplet u es isch eigentlich nüt passiert. Ner hani bim Bügu mau ä Programmierer u ä Appentwickler kenneglernt u de heimer dänkt, mir mache mau es eigets App u si churz drufabe vor zimlech genau 10 Jahr live gange. U plötzlich, nachdem ä Journalist im mediale Summerloch mau ä chlini Story über üs gmacht het, isches eifach crazy explodiert. Würklech heftig! Mir hei sogar ä Pris gwunne! U sit dem stige u stige d Zahle...

Wi viu Lüt hei de hüt sones Aareguru-App? Mir hei 60'000 Installatione uf iPhones und bim Android-App, wos no nid so lang git, si ‘s öppe 20'000. Uf dr Website himer pro Summertag ono mau so 3'000 bis 4’000 Lüt. U jtz ganz neu gits de no ä iWatch-App!

Wie louft das mit em Mässe? Ig häbe jede Morge dr Finger ids Wasser u nime ä zünftige Schluck, damiti aues guet cha beurteile. Nei Seich: Mir hei üsi Date us dem versprayte Hüsli zwüschem Schönoustäg und Eichholz links grad ar Aare wo dr Wäg ä Kurve macht. Das ghört am Bundesamt für Umwelt. Di Temperatur-Azeige si ner outomatisiert. Drum gits im Summer o nid viu ztüä.

U wi weiss de das App geng, wenns «brüntschelig» isch, mä «mit Boumstämm» würdi schwümme oder we dr Dänu grad mit dr Gravatte isch ga ä Bedu zwicke? Di outomatisierti Sprüchli-Skala channi ner eifach jederzyt mit mim Guru-Admin-Maschineli überschribe. («Lug so», zeigter, «Plütterwarm plus enter.») Das fägt. So hei mir da scho auerlei Seich gschribe. D Inspiration daderzue isch entweder gottgegeben oder Ghirnfurz – jenachdem wimä däm gegenüberstehit. Mir überchömä ner o Reaktione u ds isch haut scho schön u motiviert eim, näbst däm, dass mr haut sowieso säuber ou strubi Aarefreaks si.

Ig ha jtz sogar es Bärndütsch-Wörterbuech us de 60er-Jahr vo mim Grossvatter selig gerbt. Jtz bini bewaffnet! Das hani immer griffbereit u cha so o ii Zuekunft witer Sprüch komponiere. Aber es isch für üs o wichtig, dass d Liechtigkeit und dr Spassfaktor erhaute blibt. Muesch eifach mitem Fluss gah!

Verlosig – wi fescht Aareguru bisch du?

Beantwort die folgendi Frag per Mail a mail@baernbox.ch und gwinn mitemne birebitzeli Glück eis vo dene schöne Tüechli für di gepflegtä Aareschwümmer*inne vo hüt:

Vo wo wohäre fliesst üsi schöni grüäni Aare?

  1. Vom Meer id Bärge

  2. Vom Thunersee ii Bielersee

  3. Vom Rhy ids Oberland

Verwandte Beiträge