• Su Elsener

10 Jahr FraktionsZwang


Himmuplütter! Jetz isch das scho 10 Jahr här, wo dr Tinu Schneider ä Schnapsidee het gha u äs wäutwyt einzigartigs Projekt het gstartet! Är het jedes Jahr mit sire Schueuklass e Bänd gründet u dänkt, was mit Jugendliche geit, klappet o mit Stadträtinne u Stadträt. Gseit isch gmacht u scho gli drufabe hei sech 10 komischi Vögu im Turmzimmer vom Schueuhuus Bachmätteli troffe u hei afa lärme. Es paar Cover-Songs, drü Akkörd u ä Klarinette hets bruucht u nach es paar Wuche hets ömu scho "Niveau Schüelerbänd" gha.

We ä Horde PolitikerInne us (fasch) aune Parteie duurend zäme ines gheims Rüümli geit, duurets ned lang, bis d Press devo erfahrt u so isch amne hiube Summeraabe ä ganze Konvoi zum Jerry Grossmann pilgeret, zum mau es Ohr vo derä kuurlige Bänd z nä.

Scho gli druuf hets de o es Gaschi (Engagement) gä u mit Cowboyhüet u Karohemmli isches ab ufd Bühni vom Openair Chino. Allgemeinä Tenor: Es het no viu Luft nach obe. Fakt isch: es het gfägt! U us Polit-Tierli si Rampesöi worde!

Mitem Tinu u em Simu hei sech di richtige gfunde u zäme hei si aagfange Songs schribe. Geng wi meh eigeti Lieder si entstande, id Vernähmlassig cho, diskutiert u arrangiert u so zumne Teil vo üs worde. Us dr Klarinette isch es Sax worde, usem Pesche dr Rithy u denn dr Andrin u irgendwenn isch d Christa fix ä Teil vo FraktionsZwang xi.

Mitem Üebe isch d Sicherheit cho, mit de Uftritte dr Hunger uf me u plötzlech si mir im Studio gstange u hei 2 Songs uufgno u zumne Siuberling presst! Gmischt het ke gringere aus dr Oli Bösch!

Üsi grossi CD het de dr Name "Frischtverlängerig" becho. U tatsächlech hets eini gä u aui si nomau gwählt worde! Irgendwenn hei mir aagfange üsi Reglä chli ds lockere, wiu mir gfunde hei, d Bänd fägt zfescht, aus das mir d Mitgliedschaft vom Mandat wei abhängig mache. Zur Zyt si nume no s Pätti u dr Bärni im Stadtrat. Derfür hei mir mit Aline u Christa zwöi Nationalrätinne. U politisch si mir aui meh odr weniger geng no. Ömu s stürme u spotte über di parlamentarische Aktualitäte het ke Bitz nacheglaa.

Mittlerwyle bechöme mir Komplimänt vo denä wo üs belächlet hei u die, wo üs geng understützt hei si stouz druf, das es nüm sooo viu Luft nach obe het, wi o scho! U o wes mängisch hert het, am Samschti morge am 11i im Üebigschäller imTscharni ds si, so fägts haut immer nach chürzischter Zyt. Üses musige, stürme u zäme si, lö mir üs ned la nä! • Su Elsener (Vocals, GFL) • Aline Trede (Vocals, Grüne) • Simon Glauser (Vocals, SVP) • Patrizia Mordini (Guitar, SP) • Tinu Schneider (Guitar, BDP) • Andrin Soppelsa (Bass, FDP) • Mario Imhof (Drums, FDP) • Bernhard Eicher (Keys, FDP) • Thomas Göttin (Sax, SP) • Christa Markwalder (Cello, FDP) http://www.facebook.com/fraktionszwang

Veranstaltungshinweis Jubiläumskonzert

Verwandte Beiträge