Dr rot Stueu

Über Nacht hets ä rote Stueu gä! U zwar nid irgend ä Stueu. U scho gar nid irgend es rot. Nei! – Es isch di auti Bärnerfahne, wo nöi dä Sitz ir oberschte Reihe vom Sektor A ir Allmänd ziert.

 

U die Fahne uf däm Sitzplatz zouberet am Fritispiu gäge Zätt so mängem SCB- Fan es Grinse ufs Gsicht u füllt ds Härz mit Wehmuet. Es isch dr Sitzplatz vom Tuni (Martin Megert), wo di letschte Jahre ungerem Name "Hardboiled" di trääfschte, kompetäntischte, fantasievouschte u versoutischte Mätschbrichte wäutwyt gschribe het. De Gniesserinne u Gniesser vor dunkle Siite vom Humor isch är natürlech scho ä Begriff gsi, woner no uf dr legedäre Homepage vo de Bäregräbeler dr "Furzchopf vor Wuche" erkore u mit sine Fründe u Gliichgsinnte sprachlech akzentuiert d Mätsche vom SCB skellettiert het.


Mitem "Hardboiled" heter ä Coup glandet, wo sech über "d Wand" vo Bärn use bis id Garderobe ud Teppichetage uusbreitet u o i de angere Fangmeinde Aahänger gfunde het.


Weme aube nach de Uswärtsmätsche hei gfahre isch, hets eifach derzue ghört, em Tuni si Mätschbricht ds läse. U o we me im Stadion no chli überhöcklet isch, hets scho gli mau gheisse "Hesch dr Hardboiled scho gläse?" De si di nöischte Wortkreatione u Übernäme diskutiert u i täglech Sprachgebruuch integriert worde. Natürlech hei od Spiler gwüsst, wi si im Mätschbricht heisse.


Jetz hets ir Allmänd ä rote Stueu, u dä zouberet üs es Grinse ufs Gsicht u füllt s Härz mit Wehmuet.
 

Danke Tuni!

 

 

 

Please reload

Verwandte Beiträge

Please reload