Russland Tagebuech Teil 2

Sleepless in St. Petersburg: Das si se auso: di berüemte white nights vo St. Petersburg! Verwache- Verflixt, i ha verpennt- ah nei, ersch drüü! Im Summer schlaft die wunderschöni Stadt nie. Überau lache u ploudere fröhlechi Stimme, Musig dringt us aune Clubs u Bars. Vom chaute u nasse Wätter lat me sech ned la abhaute- dr Summer isch schliesslech churz..

 

 

Hui... was fürne Tämperatursturz! Nachdäm i in Rorstov, Kaliningrad und Nizhny versuecht ha, vo Schatteplätzli zu Schatteplätzli ds tüüssele, damit i ned wine Vampir zu Stoub zerfaue, isches hie 20° chäuter. St. Petersburg macht eine uf Herbscht. Zum Glück gits unzähligi Beizli u Cafés wo zum gniesse iilade. U das ganze Tribe mau us Perspektive vom ne Chihuahua z beschtuune, het o öppis.

 

 

D Nacht nachem 3. Spiu: churz nach Abpfiff, öppe am haubi zwöufi lokali Zyt, stani verzouberet vorem Stadion: es isch klar, das mir gäge d Schwede in St. Petersburg spile wärde u vor mir isch ä Himmu, wo wunderschön vo rot über blau is Schwarze verlouft. Euphorie pur! Im Stadtzäntrum aacho isches dunkli Nacht, es wir gli eis. Mir gö no ufne Schlumi ine Bar u när das: wo mir use chöme wirds häu. D Nacht het scho widr rosaroti Ränder, wi dr Büne so träffend singt. Es isch haubi drüü! I mache die Föteli ohni künschtlechs Liecht u ha se äxtra ned bearbeitet! Faszinierend. Morn geits i Norde, i di wysse Nächt vo St. Petersburg. I fröie mi, geit das aues no chli wyter!

 

 

Kes Biud isch sinnbildlecher für mi Iidruck vo dere Stadt! Aut u Nöi träffe unmittubar ufenang. Uf ei Blick es historisches Huus, wo chönnt tuusig Gschichte verzeue. Und uf dr andere Site vor Strass es glänzends Gebilde us Glas und Stahl. Glych ischs mir de Outos. E windschnittige Hochglanzschlitte steit näbem roschtige Lada, wo no d UdSSR erläbt het. D Wolga zieht träg dür die Millionestadt u git ihre e wunderschöni Rue u Glasseheit. Eifach d Ouge uf, aui Sinne yschaute u la tribe!

 

Moskow by night: d Biuder würke stiu, nachdänklech d Stadt gar nid! Feschtifüdle überau! Aui Farbe u Flagge wärde vor jedi müglechi Sehenswürdigkeit ghäbt, tanze u lache fürd Kameras.

Je me verschideni Länder vor ei Linse gumpe, desto besser! Au paar Meter het sech e Bänd installiert u versuech lüter mit ihrne russische Schlager u internationale Evergreens d Lüt zu sich ds hole. U plötzlech das: es Meitschi mitemne Mikro u e Typ mitere schrummende Haubakkustikgitarre u rund ume junge Mönsche, wo jedes Wort mitsinge. Verstaa kes Wort, aber bi berüert u verzouberet. U ds letzte Wort hani verstande:
 

«Спасибо- danke!»

 

Su Elsener ist als Fanarbeiterin an der Fussball-WM in Russland. Für den BÄRN!BLOG schickt sie uns regelmässig Fotoimpressionen und Tagebuchnotizen.

 

 

Please reload

Verwandte Beiträge

Please reload