SCB: Verbii

Dr Momänt wos klar isch. Kes Zrügg. Ke Widerholig. Ke Rekurs. Ke Frag. Es isch eifach eso. Muesch di dermit abfinde, das ab morn wider es angers Läbe aafaht. Morn isch Summer, chasch ad Ferie dänke u d Winterchleider ymotte.

 

Es git so viu verschideni Saisonändi! Di letschte zwöi hei uuu gfägt, u es schwarzgäubrots Meer het im April bi strahlender Sunne dr Bundesplatz gfluetet. E ganz heftige Momänt hingäge isch im 2012i gsi, wo 2.5 Sekunde vorem Abpfiff dr Pögg für Züri isch im Bärner Goal glandet. Ä hör-und spürbare Schock het d Allmänd packt u jede drinn für langi Zyt „troumatisiert“. Mängisch isch me sang- und klanglos i Summer gschickt worde, fasch froh drum, das es in es paar Monet nöi aafaht und e nöii Hoffnig zrügg chunnt. Schlimm isch o das 1:0 im auerletschte Spiu 2007 z Davos xi. Grossi, starchi Manne hei Träne i de Ouge gha u dr Spiler Simon Gamache, wo ä Saison lang dr Goldhelm treit het, isch nie meh a sini Leischtige häre cho u irgendwo verschwunde.

 

I däm Jahr het dr SCB no es letschts grosses Spiu gha im Hauestadion. Är het kämpft u tanzet, provoziert u gjublet. Am Ändi isch är abr nid aus Sieger vom Ysch. Dr hungrig Löi het dr Bär gschlage. Villech chly ä Revanche für ds Vorfüere vor zwöi Jahr. Denn hei sech d Bäre ine Ruusch gschpiut u d Löie i nume vier Spiu id Summerferie gschickt.

Scho gli stöh d Farbe fescht, wo die Saison für sich entscheide. Schwarzgäubrot isches ämu nid. Üsi Farbe tanze nümm ir Allmänd, d Trummele si abghänkt unä Rue breitet sech im Tämpu uus.

 

Di grosse Emotione, di farbige Choreos ud Fängsäng si nume no Erinnerige. Dr Bär nimmt jetz si Summerschlaf (u tröimt äuä vom ne Gäub-Schwarze Fahnemeer, wo der Bundesplatz fluetet...).

 

 

 

Please reload

Verwandte Beiträge

Please reload