Dr Fän – potänte Goldesu u gfährlechs Sicherheitsrisiko?

Was wäri Hockey nume ohni ihn: Dr Fään! Är macht Stimmig, Choreos, isch ä Schiri mit tuusig Stimme u macht Wurscht- u Bierverchöifer glücklech. We me ds erschte Mau im Stadion isch u erläbt, wies sech aafühlt, we zähtuusig Kehle glichzytig mit eim schreie, wird me zum ne Teil vom Ganze, zure Gmeinschaft. Wi dr Mani Matter xunge het: mir hei äVerein, i ghöre derzue.

Dr Pögg geit as Alu u es ganzes Stadion, Gäschte- u Heimfäns, schnufe gliichzytig ii. Äs Gool wird gschosse u aui schreie, ob zum juble odr zum futtere! Oder o di totali Stilli, we d Saison 2.7 Sekunde vorem Schlusspfiff z Änd isch. Dr Soundtrack vomene Stadion, produziert vo tuusige vo Fäns isch einzigartig u immer angersch - je nach Spiu. Ambrífäns töne angersch aus Gänfer. Heimsieg u Usswärtssieg si ungerschidlech. U d Playoffs „sounde“ no einisch ganz anders aus d’Quali.

Wichtig bi sonere Symphonie isch aber ou ds Zämespiu us dr Rivalität zwüsche de gegnerische Fängruppierige. Iigfleischti Fäns reise mit ihrem Club dür di ganzi Schwiiz, dür ganz Europa. Aber wie lang no?

 

Einigi Clubs xeh d’Gäschtefääns geng wi meh houptsächlech aus Sicherheitsrisiko. Drum wärde Sektore verchlineret, d Priise ufegschrubt u d Aareisebedingige komplizierter. So söu am Gaschtfän ds Aareise vermiiset wärde. Ds Lausanne hets im Momänt, wiu es nöis Stadion bout wird, überhoupt ke Gäschtesektor. In Zuekunft söu me dört nume no mitem Car chönne aareise, wo me diräkt ungerem entsprächende Sektor usstigt. Ä angere Zuegang zur Gaschttribüni guts nüm. Im ne Stadion, wo drü (3!!!) Minute vom Bahnhof ligt, söu d’Härereis mitem Zug nüm möglech si?! Aber o angeri Stadie versueche d Gägner subtil vom Bsuech abzhalte. ID- Kontrolle u fotografiert wärde am Iigang isch da genau so effiziänt, wie es Verbot vo fäntypische Utensilie oder es schlächts Catering-Aagebot. Leider isch das ä Trend. Eine, wo mit dr Realität im Yschhockey so gar ned zäme passt. I de letschte Jahr si im Kanton Bärn d Sicherheitschöschte ufnes Minimum gschrumpft. Hockeyfääns touche i de Zitige chum me uf. U d Rächnig isch eifach: I denä Stadie, wo d’Fäns aus Gäscht behandlet wärde, gits chum Problem. Dört, wo Robocobs grimmig id Wäut luege, isch d’Stimmig aagschpannter. Di orcheschtrierti Vorverurteilig macht hässig u me fühlt sech i sire Freiheit machtlos iigschränkt. Huusregle wärde aber a Orte, wo me mit Respäkt behandlet wird, freiwillig iighalte. Bispiu Biel: Derby-Stimmig, viu Aahänger vo beidne Siite u ä uuralti Rivalität si d’Grundvoruussetzig. Fründlechs u hiufsbereits Sicherheitspersonal, ä grosszügige Sektor u es viufältigs Catering si hingäge ä Schritt i di richtig Richtig. Me geit ufd Fänbedürfniss ii u laht ne o es gwüsses Mass a Freiheit. Wiu o hie giut:

 

Wer die Freiheit aufgibt, um Sicherheit zu gewinnen, wird am Ende beides verlieren.

(Benjamin Franklin)

 

Bild: Fanprotest in Lausanne gegen immer kleinere Gästesektoren

 

 

Please reload

Verwandte Beiträge

Please reload