Sie isch wieder da!

16/01/2018

 

Sie isch wieder da! D Kunstysbahn uf em Bundesplatz zieht wieder Jung und Alt a, Sportlechi u Fuuli, Touris u Bärnerinne, Gniesser u Musiginteressierti- eifach aui! Ob me vorem Bundeshuus wott mit Schlööf umekurve odr im warme Beizli Fründe träffe- es isch eifach ä härzleche Träffpunkt z’mitz in Bärn. Es isch ä Platz, wo uu viu Möglechkeite bietet: schnäu ä Portion Pommfritt schnabuliere oder ä gmüetleche Fondueaabe gniesse, bim ne Käfeli churz pöisele odr mitem’ne feine Pale Ale aastosse, palavere odr Musig lose u d Ching chli la töbere. Im Summer bietet Bärn unändlech viu Abwächslig: verschidenschti Pop-Ups, Konzärtli unger freiem Himmu, Strassecafés i aune Gasse, löie ar u ir Aare.

 

Aber im Winter zie sech d Bärner Bäre i ihri Höhli zrügg, u gö höchschtens amne Tisch mit wisse Tischtüecher fein ga ässe odr juble dr SCB zu Siege. Da füllt di chliini Ysbahn scho ä Lücke. Grad wes ke Schnee het, isches ned eifach, di Chliine müed mache u ds fordere. Schlööfle tuet ar Entwicklig vom Körpergfühl, Glichgwicht u Säubschtvertroue vo Ching guet! Mitem Seehung übere Gledu ziibe fägt, u we mers de ändlech ohne di orangschi Hiuf cha, machts das stouz. U für die Ching, wo scho besser si odr besser wei wärde, gits immer am Donnschti am vieri betröiti Kurse.

 

Ds Zämespiu vom SCB u de drüü Organisatore isch ideal: sigs d SportGastro, wo dr Goume verwöhnt odr d Schlööfvermietig, wo derfür sorgt, das me guets Material a de Füess het odr siges dr Mario, dr Theo u dr Jimy, wo luege, das sech aui willkomme fühle! Aues in auem ischs ä rundi Sach. S Programm isch so viusiitig, wie d Lüt wos aazieht. So gits am Sunnti Morge ab de nüüne ä Bröntsch mit Jodlerchöörli u am Aabe spile Bänds mit Gitarre u Schlagzüg vom achti bis am zähni.

 

Bis am 18. Februar isch das chline Bijou no im Härz vo Bärn. När verschwindet dr ganz Winterzouber, bis im nächschte Dezämber, wenns widr Jung und Alt, Sportlechi u Fuuli, Touris u Bärnerinne, Gniesser u Musiginteressierti ufe Bundesplatz zieht.

 

(Kursdate u Sunntigskonzärt uf www.kunsteisbahnbundesplatz.ch)

 

Su Elsener, Fanarbeiterin und Sängerin Fraktionszwang

 

 

Please reload

Verwandte Beiträge

Please reload