Enttüüscht? Sicher. Hauptsächlech wiu di hochstehende Spiu für die Saison düre si. Wiu i nüm i Städt lande, woni nie ufem Radar gha hätt. Odr wär kennt scho Hradec Kralove? I has gnosse, i derä Bierknellä mit de massive Holztische u de öppe 10 Zapfhäne. Ire Altstadt wo uusxeht, aus chäm ds Aschenbrödel samt Prinz usem nächschte gäube odr häublaue Huus use.

 

Bis hüt weiss ussertem Calle Andersson äuä chum eine, wie mer Växjö richtig uusspricht. Aber d Heimetstadt vo de Lakers bliibt i gueter Erinnerig. Im Stadion wird Gastfründschaft gläbt! D Sicherheitslüt si härzlech xi, hei glachet u Kafi offeriert u hei o chli gschtuunet, ab dr euphorische Understützig vo de 30 mitgreiste Nase.

D Champions Hockey League zieht viu weniger Zueschouer aa, aus si verdient! Hochklassigs Hockey vor haublääre Räng. D Schlussminute si so fesselnd u spannend xi, dass dr ganz Gäschteblock vergässe het, z schnuufe. Äs Niveau wod uf nationaler Äbeni säute xehsch!

 

Liecht erschlage sitze mir im Bus u fahre dür verschneiti südschwedischi Wäuder Richtig Flughafe. Es paar Stung isches häu, bevors am drüü widr iidunklet. Ä Melancholie liit ir Luft. Wenig het gfäut u ds Abentüür wär witer gange. Aber we me gäge ds wou momäntan beschte Team in Europa i somne Spektaku uusgschide isch, de mues me äuä nid enttüüscht si, sondern dankbar für au di geniale Momänte!

 

 

Please reload

Verwandte Beiträge

Please reload