• Su Elsener

Der Plüssi hätt di Ehr verdient!

„Hät är doch no es Jahr dra ghänkt, de chäm sis Nummero jetzt o ungers Dach!“ Ä Satz wo me hüfig ghört, sit dr Martin „Plüssi“ Plüss si Rücktritt bekannt gä het. Ä sone Vorzeigeathlet, wo i 9 Jahr SCB meischtens aus Käpten sis Team vier mau zum Titu gfüert het, hätti die Ehr doch verdient, heisst uf dr Rampi. Aber d‘Kriterie si sträng u är het sis 28i haut eis Jahr zweni lang treit.

I de Härze vo de Bärnerinne u Bärner het är si Platz glich für langi Zyt uf sicher. So langs im Tämpu no Lüt het, wo miterläbt hei, wi är ufem Ysch agiert het, wird si Name nid nume wäge de Erfolge unstärblech si. Är wird o für die Zyte sta, wos üs ned guet gloffe isch. Wo d‘Mannschaft chuum es Gou preicht u s Spiuglück eifach geng bi de angere kläbt het. Wo nume dr Trisu u dr Plüssi regumässig ihri Leischtige hei chönne abrüefe u ihri Gschpänli aube widr usem Loch gholt hei. Wo dr Plüssi mit em Goldheum quasi im Alleigang d Playouts verhinderet het.

Dr Martin Plüss het immer uf sis Buchgfüel glost, u het dermit erwisenermasse doch geng rächt gha. Es het ne - scho vorem SCB - zu Meischtertitle im In- und Usland u speter zu WM- Siuber gfüert. U es het ihm o gseit, wenn dr Momänt zum Rücktritt us dr Nationalmannschaft ideal isch. Eine, wo so dermasse mit Liib u Seeu ä Hockeyler isch, wird o wyterhin däm Sport tröi blibe. I weler Form o immer…

U simer ehrlech: voletscht hei mir zum Bärnermarsch xe ds 26i ungers Hauedach schwäbe u scho gli folg ihm s 72i. Das es somne grossartige Sportler u Mönsch ned dörthäre glängt het, understriicht am Schluss o d Leischtig vo sine langjährige Teamkollege u jedem einzelne, wo sis Nummero nie me vergä wird.

Verwandte Beiträge